Yangon Jinghpaw Wunpawng Hkalup Hpung gaw KBC, Lawu Ga Ginwang a Buga Hpung langai mi rai nga ai. 1979 ning, September shata (30) ya shani hta KBC a Buga Hpung langai hku nna masat la sai.

    Yangon Jinghpaw Wunpawng Hkalup Hpung hpe Hkalup Hpung a hkrang hte maren ladaw hte ladaw (term) hku woi awn let Nawku Hpung hpe grau grau shangang shakang lai wa sai.

    1963 kaw nna Yangon Dakkasu jawng wang kaw nga ai Judson Nawku Htingnu hta nawku dawjau lai wa sai. Dai aten laman hta 1974, 1988 hte 1996 ning hta nawku dawjau ai lam n lu galaw ai ten ni mung nga lai wa sai. 1997 ning November shata (23) ya shani hta Nawku Htingnu kaba hpe ngut la nna hpung masha 2000 jan hte wu wu di di kabu gara dingshawn shang lu la sai.

    Yangon Jinghpaw Wunpawng Hkalup Hpung a Nawku Htingnu gaw htap masum re ai htingnu kaba rai nga ai. Nawku Jawng a hkringdat gaw, No. 40/B, Shwepyi Aye Lam, Sanchaung Lawk, Yangon Mare re ai. Hpung Woi ni nga na htap masum nta hpe 1998 December shata hta gawgap hpang nna 1999 April shata hta ngut kre la lu sai. Myen ga hku nawku dawjau hpawng hpe 1998 ning kaw nna nawku hpang sai.

    Buga Hpung a Laika Dum (Library) hpe 1999 ning hta hpaw hpang sai. Myen laika buk (800), English laika buk (400), Member (115) re. 2004 ning hta Nawku Htingnu kata e nbung katsi htingram jak kaba ningnan hpe US$ 37118.40 hte mari shakap galai la lu sai.  Nawku Htingnu (10) ning hpring chyeju shakawn hpawng hpe 2006 ning November (25) ya shani hta galaw la lu sai.

    Light-emitting diode (LED) wan signboard hpe 2013 ning November shata (16) ya shani kaw nna shakap hpang sai. Nawku Htingnu Jak Lakang hpe 2016 ning April praw (1) shani kaw nna 2018 ning January shata (21) ya shani akyu hpyi apnawng sai. 2013 ning hta Nawku htingnu hta CCTV (20) hpe shakap nna jai lang hpang wa sai.Yangon Jinghpaw Wunpawng Hkalup Hpung gaw lawu de na Dap, Bot, Komiti ni hpe hpaw shabawn da let sasana magam bungli shachyen shaja galaw nga ai Buga Hpung langai mi re.

  1. Mungga Tingnyang Komiti
  2. Hpungtau Bot
  3. Sut Bau Kyem Dap 
  4. Hkristan Hpaji Dap
  5. Kabu Gara Shiga hte Sasana Dap
  6. Num Komiti
  7. La Komiti
  8. Ramma Komiti
  9. Gawgap hte Gram Komiti
  10. Music Komiti
  11. Htaw wa htaw sa Komiti
  12. Jahpan Jep Komiti
  13. Jak hte Arung Arai Komiti
  14. Mu Na Kyithkai Komiti
  15. Bawng Ring Komiti
  16. M. Zau Yaw Masat Ginra Komiti (Retreat Center)
  17. Ningbaw Ningla Shakat Komiti
  18. Dagon Hpung Ginra Komiti
  19. Insein Hpung Ginra Komiti
  20. Shwepyithar Hpung Ginra Komiti
  21. Hpaji Shakat Sasana Ginra Komiti